A Mesa económica das Pontes reclama a Endesa un plan de pre-desmantelamento
![reunion mesa impulso economica as pontes](https://terrachaxa.com/wp-content/uploads/2023/10/reunion-mesa-impulso-economica-as-pontes.jpg)
A Mesa para o impulso da actividade económica das Pontes celebrou onte unha nova reunión, na que participaron as administracións públicas e os axentes económicos e sociais para avanzar na reindustrialización da comarca.
Ao encontro asistiron a conselleira de Economía, Industria e Innovación, María Jesús Lorenzana; o alcalde das Pontes, Valentín González Formoso, así como representantes do Instituto de Transición Xusta e da Subdelegación do Goberno, de Endesa, da CIG, UGT e CCOO, da Confederación de Empresarios, da Asociación de Empresarios Seara, da Asociación de Comerciantes, Hostaleiros e Empresarios das Pontes, así como da Xunta.
No encontro, as administracións e os axentes sociais coincidiron en reclamar a Endesa o plan de pre-desmantelamento así como de desmantelamento da súa central térmica, xa que é preciso contar cun calendario con prazos definidos que achegue certezas e permita afrontar, de xeito paralelo, os proxectos industriais e enerxéticos nos que se está traballando.
Precisamente, na reunión avaliouse o estado destes proxectos industriais estratéxicos e das iniciativas que prevén implantarse na comarca coas que se pretende dinamizar a actividade económica e crear novos postos de traballo.
Os asistentes incidiron en que é prioritario traballar nun proceso de transición que garanta tanto o mantemento da actividade como o emprego.