A Moexmu recibirá a V da Federación de Asociacións de Veciños de Lugo
A Federación de Asociacións de Veciños da provincia de Lugo acordou na súa Asamblea Xeral de conceder unha das "V, de Veciño Exemplar" na súa XXII edición á Moexmu. A entrega da mesma, terá lugar o vindeiro 20 de outubro no Pazo de Feiras e Congresos da capital de provincia.
Dende a Federación quixeron respaldar o traballo que ao longo desta corenta edicións é levado a cabo pola veciñanza de Muimenta a través dos seus empresarios e empresarias, en especial, a prol do noso rural, grazas, sobre todo, á organización do único concurso de gando que se mantén na provincia de Lugo, unha das actividades máis destacadas dentro do amplo programa que ten lugar no pobo, o primeiro fin de semana do mes de abril.
O pasado mes de marzo, a Moexmu recolleu o XXIV Premio Aresa de Desenvolvemento Rural, concedido por este grupo empresarial en colaboración coa U.S.C.. Igualmente, o pasado mes de xuño, presentou o dossier, ante a Axencia de Turismo de Galicia, para acadar o Título de Festa de Interese Turístico de Galicia.
As persoas que o desexen poderán acudir a este evento, para o que se poñerá un autobús desde Muimenta. As persoas que desexen participar poden anotarse na Mercería Teresa antes do 30 de setembro por un prezo de 3 euros. Este inclúe xantar e viaxe en bus.