A Moexmu recoñece o apoio da Vicepresidencia da Deputación de Lugo na celebración do seu 40 aniversario
O coordinador da Moexmu, Xosé Manuel Rus, entregou unha insignia conmemorativa das 40 edicións da feira de mostras ao deputado do Rural, Daniel García Fernández. Este distintivo simboliza o recoñecemento á colaboración da área provincial nos actos celebrados o pasado mes de setembro, cunha homenaxe especial ás máis de 100 veciñas e veciños que participaron nas comisións organizadoras ao longo das catro décadas de historia da feira.
No acto, Daniel García destacou "o compromiso da área de Rural coa organización da feira, que se consolidou como un referente no ámbito da gandería e do rural grazas á dedicación da veciñanza de Muimenta". Ademais, aproveitouse o encontro para avanzar na renovación da colaboración entre a Vicepresidencia da Deputación de Lugo e a organización da Moexmu, de cara á súa 41ª edición.
Un ano máis, a feira contará co apoio das áreas de Rural e Cultura da Deputación, reafirmando o seu papel como escaparate esencial do mundo rural e gandeiro na provincia.