A Pastoriza mellora a rede de abastecemento e a eficiencia enerxética do PAI con novos investimentos
O Concello da Pastoriza vén de recibir a resolución favorable de Augas de Galicia para a concesión de dúas axudas que permitirán mellorar a rede municipal de abastecemento de auga. Unha das achegas, por importe de 28.331,03 euros, destinarase á renovación de bombas nas estacións de bombeo e captación de Fonmiñá e Baltar, co obxectivo de reforzar a eficiencia e a seguridade do subministro no municipio.
Así mesmo, Augas de Galicia concede tamén 11.927,75 euros para a instalación dun sistema de telemetría de control en varias estacións de bombeo situadas en Vián, Pastoriza e Saldanxe, o que permitirá un seguimento máis preciso do funcionamento das instalacións e unha mellora na xestión dos recursos hídricos.
Por outra banda, dende o Concello da Pastoriza infórmase que se procederá á substitución do actual sistema de calefacción de pellets do Punto de Atención á Infancia por un novo sistema baseado en aerotermia. Esta actuación, financiada pola Xunta de Galicia a través do seu programa de mellora da eficiencia enerxética, permitirá reducir o consumo e avanzar cara a un modelo máis sostible e respectuoso co medio ambiente no servizo municipal de atención á infancia.