A Pastoriza queda sen orzamento polos votos en contra dos dous partidos da oposición
Os votos en contra do PSOE e o BNG, que sumados superan aos do equipo de Goberno, o PP de Darío Cabaneiro, tumbaron a proposta de orzamentos, que se establecían en 3.842.252 euros e sobre os que o alcalde dixo no Pleno que seguen a liña das anteriores lexislaturas.
Para os socialistas, os orzamentos son pouco ambiciosos e perden con relación ao ano pasado, establecendo unha baixada duns 17.000 euros, unha baixada que o alcalde xustificou por un descenso da recadación, aínda que esta se compensa pola subida de ingresos das taxas. Tamén xustificou a situación polo pago de contas pendentes.
O grupo municipal do BNG votou en contra do orzamento presentado pola corporación para o exercicio 2025 por considerar que se trata duns orzamentos "regresivos, opacos e sen proxecto para o futuro do concello".
Para os nacionalistas unha das decisións máis graves é a drástica redución dun 62% nas partidas destinadas a investimentos reais (de 229000 euros a 84900), "o que supón frear en seco calquera posibilidade de modernización dos servizos públicos ou mellora das infraestruturas municipais. A isto engádese a eliminación dunha partida de 15.000 euros para continxencias e urxencias, un fondo básico para facer fronte a imprevistos que poidan afectar á veciñanza".
Desde o BNG denuncian que 2non hai nin rastro" de planificación para actuacións moi demandadas, como a inversión para a mellora da depuradora municipal, "reclamada incluso polo propio Partido Popular durante anos. Non se recollen tampouco investimentos clave en mantemento de infraestruturas".
Consideran que "a opacidade e a falta de transparencia" son cada vez máis preocupantes. "O goberno local dificulta o acceso ás facturas á oposición, a pesar de que temos dereito a coñecer en que se gasta o diñeiro de todas e todos. Levamos meses agardando pola documentación do primeiro trimestre de 2025, e só mediante reiteradas solicitudes conseguimos, de forma parcial, parte da información. Esta actitude obstaculiza o noso labor de fiscalización e contravén os principios máis básicos de bo goberno. Mentres que nas anteriores lexislaturas tódolos concelleiros tiñan acceso ás facturas e os seus pagos no momento", dixo a voceira, Elva Carreira.