A Pena celebra esta fin de semana a primeira Mostra de Arte e Artesanía de Cospeito
A Asociación Veciñal A Pena de Santa María de Cospeito celebra unha nova iniciativa cultural coa que quere poñer en valor o talento local. Trátase dunha mostra colectiva na que veciños e veciñas do concello darán a coñecer as súas creacións artísticas e artesanais, abrindo unha ventá á diversidade de propostas que se fan no propio municipio.
Na exposición, que poderá visitarse os días 25, 26 e 27 de outubro na Biblioteca da Casa da Cultura da Feira do Monte, haberá pintura, marquetaría, talla en madeira, cosmética artesanal, deseño, crochet e outras disciplinas que amosan a creatividade e a riqueza cultural de Cospeito.
Poderá visitarse de 11.30 a 13.300 e de 17.00 a 20.00 horas.
Desde a asociación subliñan que a mostra quere ser un punto de encontro entre artistas, artesáns e público, ademais de servir como escaparate para dar visibilidade a aquelas persoas que desenvolven o seu traballo de maneira máis discreta. “Trátase de recoñecer o que temos preto, de amosar que no noso concello hai moito talento e de invitar á veciñanza a gozar del”, sinalan.