A proposta festivaleira estival do 2023

O que queda de verán concentra numerosas citas musicais na provincia.

Os meses de agosto e setembro concentran o que resta de festivais de música na provincia de Lugo. Atrás quedaron outras citas obrigadas, como o FIV de Vilalba ou o Resurrection Fest de Viveiro, o primeiro encargado de abrir o tempo de festivais e o segundo como un referente internacional.

Pero aínda queda moito por celebrar. A primeira fin de semana reuniu tamén varias citas obrigadas de festivais, entre o que destaca o de Pardiñas, un referente na programación da provincia xa que é Festa de Interese Turístico Galego. Este ano celebrou a súa 44 edición reunindo novamente ao máis destacado do panorama folclórico e étnico.

Xunto a este tamén Sarria viviu un dobrete de celebracións a primeira fin de semana. Así, arrancou o Sarria Blues no Camiño, que este ano tivo lugar do 3 ao 6 de agosto e que incluíu diferentes actividades, ademais dos distintos concertos.

Mentres o blues é o protagonista, a música de festa é a que caracteriza tamén ao Verbena Fest, que tamén en Sarria celebrou a quinta edición dunha cita imprescindible.

Do 3 ao 5 de agosto de 2023, Antas de Ulla e Monterroso, acolleron unha nova edición do Festiulloa, o Festival de Música de Cámara da Ulloa, que chega a súa 14ª edición.

Este festival de música clásica e actividades medioambientais está organizado pola asociación Quercus Sonora.

A primeira fin de semana de agosto, Barreiros rende homenaxe aos seus fillos emigrados que adoitan retornar á súa terra de orixe polo menos durante o verán. Así, no Festival Internacional do Emigrante, a alegría está asegurada coa queimada, os petiscos e a música de diferentes agrupacións folclóricas.

O Concello de Cervo convida a gozar do Festival Folclórico internacional e Infantil que se celebrou en San Cibrao, na Praza dos Campos, a primeira fin de semana de agosto da man do Grupo Folclórico Mistura.

Durante o mes de agosto as distintas localidades da Mariña acollen o Festival Bal y Gay, o único a nivel nacional. Enche cada ano de música en vivo de calidade, afianzando esta comarca lucense como destino cultural de referencia en Galicia e España.

A mediados de agosto destacan dúas citas xa habituais do programa anual. Un deles é o Festival 27327, en Begonte, que se celebra no club fluvial da localidade con sesión vermú, aberto de billarda e campionato de cimbrón incluído.

Outro é o Rabafolc, que este ano aínda non presentou o programa xa que forma parte das festas patronais, que organiza o Concello.

Na Chaira tamén destaca outra cita, o Festival Pozo Mouro, que combina música de diferentes tipos con outras actividades culturais.

Máis ao sur da provincia está previsto o Trece Roeis Fest de Pantón, que este ano acollerá a 18 grupos de música rock; ou o Ribela Love&Nature de Sarria, que se amplía a dous días e terá a 16 artistas no seu cartel.
Queda aínda sen confirmar se haberá Fich Chantada.

Para rematado agosto destaca Festival Terra Brava do Incio coa participación de aqueles que queren poñer en valor o traballo de grupos galegos por facerse oír nun contexto no que cada vez se aposta máis pola creación musical propia.

Mención aparte merece o Agrocuir, unha iniciativa celebrada no rural que ten como obxectivo reivindicar a diversidade sexual e de xénero neste ámbito. Aínda non hai programa sobre a súa continuidade.

SETEMBRO

Abrirán o mes de setembro outras tres citas, o Trementerra do Incio e o Osa do Mar de Burela, ao que se suma tamén o Xara Fest en Ribadeo.

Completan o mes outros dous festivais, o Parga Rock, que se celebra na parroquia de Guitiriz que lle da o nome, e o Caudal Fest, de Lugo, do que tamén hai xa cartel.

Pero antes de que acabe o ano Lugo completa a programación festivaleira con tres novas citas, a primeira é en outubro o Castañazo. Ese mesmo mes terá lugar o Festiblus e rematará o ano o Festival de Jazz, que se prolongará durante tres semanas na capital da provincia.

PROGRAMA

• • Sarria Blues no Camiño
    (3-6 agosto)
  • Verbena Fest Sarria.
    (4-5 agosto)
  • Festiulloa. Monterroso
    (4-5 agosto)
  • Pardiñas. Parga-Guitiriz
    (4-6 agosto)
  • Festival Folclórico San Cibrao
    (5-6 agosto)
  • Festival Folclórico do Emigrante. Barreiros (6 de agosto)
    Bay y Gay. A Mariña
    (todo agosto)
  • 27373. Begonte.
    (12 agosto)
  • Rabafolc. Rábade
    (mediados agosto)
  • Trece Roeis Fest. Pantón
    (18-19 agosto)
  • Ribela Love&Nature. Sarria
    (18-19 agosto)
  • Fich Chantada
    (mediados de agosto)
  • Pozo Mouro. Muimenta
    (19 agosto)
  • Terra Brava. O Incio
    (25-26 agosto.)
  • Agrocuir. Monterroso.
    Finais agosto. Sin confirmar
  • Trementerra. O Incio
    (1-2 setembro)
  • Osa do Mar. Burela
    (1-2 setembro)
  • Xara Fest. Ribadeo
    (2 de setembro)
  • Parga Rock. Parga-Guitiriz
    (9 setembro)
  • Caudal Fest. Lugo
    (15-16 setembro)
  • Castañazo. Lugo
    (27-28 outubro)
  • Festival dos Eidos. Folgoso
    Finais outubro
  • Festiblus. Lugo
    (14-22 outubro)
  • Festival de Jazz. Lugo
    (4-20 novembro)