A voz dos alcaldes: “A calidade de vida dos veciños é o que nos move no día a día”
Como se iniciou na política e como se vinculou ao seu partido?
Sempre me gustou participar dos asuntos públicos, traballar polo ben común coido que influenciado polos meus pais que tiveron que emigrar a Londres e esas experiencias marcounos e con eles aos fillos. Lembro que estando na gardería en Muras que puxo en marcha o cura Don Modesto agasalloume cun libro en galego, líamo miña nai e falábanos do pasado escuro que acabábamos de vivir (a ditadura) …. logo xa no instituto empecei a ter inquedanzas políticas que se acentuaron na Universidade ao adquirir as ferramentas para coñecela Historia, e ata agora.
Como deu o salto e recibiu o impulso para ser alcalde?
Estando traballando fóra de Muras ves que podes intentar cambiar as cousas que acontecen no teu concello, mellorar a calidade de vida dos veciños, axudar a resolvelos problemas da xente… presenteime encabezando as listas do BNG no ano 2011 sendo elixido concelleiro por un voto, no ano 2015 obtivemos 3 concelleiros e conseguimos a Alcaldía, no 2019, 3 tamén sendo a lista máis votada e no 2023 volvemos ser a lista máis votada acadando 3 concelleiros, son Alcalde dende o ano 2015.
A nivel persoal, que sacrificios supón formar parte do Goberno?
Tes sacrificios sobre todo persoais deixas de facer cousas que che gustarían, quitándolle tempo á familia á xente que está preto de ti pero tamén é gratificante ao ver os proxectos que saen adiante e podes poñer pequenos graíños que axudan ás persoas.
E beneficios?
O equipo de goberno de Muras e eu coma alcalde temos por obxectivo mellorar a calidade de vida dos nosos veciños e veciñas, e este logro colectivo é o que nos move no día a día.
Como equilibra a vida pública e a privada?
É complicado, a Alcaldía absorbe tempo, es alcalde as 24 horas.
Cales son os seus obxectivos a nivel político?
Vivo o presente e trato de ir solucionando as dificultades que xorden no día a día que nun Concello coma o noso son moitas.
E se renova na Alcaldía cales son as principais actuacións previstas?
Os veciños e veciñas decidirán no futuro se queren que continúe coma Alcalde. O Polígono da Cabana que a Xunta ten bloqueado é básico para o futuro do Concello xa que temos demanda de solo industrial por parte de empresas xa instaladas aquí con proposta de creación de postos de traballo e que teñen limitado o seu crecemento polas trabas burocráticas dunha administración que nin está nin se lle espera, estou a referirme á Xunta. E coido que a repotenciación dos parques eólicos suporá un antes e un despois, xa que as repotenciacións levan aparellado unha merma nos ingresos económicos a través do Canon Eólico que xestiona a Xunta de Galicia. A postura deste alcalde e do BNG é clara, a instalación dos parques ten que redundar de maneira directa nos lugares onde se instalen, o pago da factura da luz, ingresos directos ás administracións onde se instalen son cuestións que deberían ser inherentes a estes proxectos. As posturas do PP e do PSOE non as coñecemos e xa levamos 30 anos con parques eólicos.
Cales son as principais liñas do seu programa?
Partindo de que estamos a falar dun concello onde o 60 % da poboación supera os 65 anos, a educación de calidade no rural e en igualdade de condicións que nas zonas urbanas, a saúde e os servizos sociais son os eixos arredor dos que xiran as principais liñas do noso programa. O sector primario coa creación da Marca Muras (con medidas coma os cargadoiros para axudar aos criadores de gando equino), as axudas para o pago da luz a particulares e pemes son medidas de referencia e únicas ata onde sei.
“Os parques eólicos teñen que redundar de maneira directa nos lugares onde están”
Cales considera que son as principais necesidades no seu concello?
Os concellos rurais están infrafinanciados e levan o peso das diferentes liñas de atención aos cidadáns. Véxase o caso dos servizos sociais, que están infrafinanciados cun custo hora de 26 euros e polo cal a Xunta nós da 12 euros, a educación onde as obras maiores e menores de mellora do colexio as tivo que asumir o Concello, o sector primario… as políticas clientelares da Xunta non axudan a que esta tendencia cambie, e máis cando dos 2.200.000 euros que se recadan en Muras do canon eólico só nos dan 500.000, a diferencia vai en convenios para concellos onde goberna o PP.
De que proxectos se sente máis orgulloso?
Coido que hai moitos dos cales sentirme orgulloso, hoxe en día a Marca Muras vai asociada a unha serie de feitos en positivo que fai anos era impensable, as axudas para o pago da factura da luz marcan un antes e un despois, a devolución dos montes da Gañidoira e Fragas de Ximarás, os investimentos en educación e saúde, a posta en marcha da Romaxe Artesá da Chaira, da Feira do Mel de Montaña, do Trail das Bestas, a Declaración da Feira do Poldro como Feira de Interese Turístico Galego,... son innumerables os logros acadados e que establecen as bases do Muras do futuro.
Que lle gustaría que os veciños visen en vostede como alcalde?
Un veciño máis que sempre se preocupou polos problemas da xente e buscar solucións aos mesmos.
Como é a súa relación coa oposición?
É difícil manter unha relación con aquelas persoas que se dedican ao insulto e a mentira e que non teñen a capacidade de por enriba da mesa propostas construtivas para o conxunto dos veciños e veciñas, só están a pensar no seu beneficio persoal e vexo que é unha pena que habendo en Muras persoas válidas para representar ao conxunto dos veciños teñamos esta oposición para dedicarse a destruír. Que podemos esperar da portavoz do PSOE que sendo presidenta da ANPA facía pagos á súa empresa con cartos da conta da asociación ou que podemos esperar do PP que boicotea a Marca Muras acudindo a Abadín onde goberna o PP para por en marcha medidas coma as nosas (os cargadoiros).
EN CLAVE PERSOAL
• Idade, estado civil e familiar
51 anos, casado e moi familiar
• Profesión e formación
Licenciado en Historia , traballador no Terceiro Sector en excedencia
• Se puidera escoller, que lle gustaría ser?
Veño dunha familia de gandeiros e gandeiras, o campo gústame
• Que quería ser de maior?
Moitísimas cousas , desenvolvín moitos traballos, na granxa, peón, mozo de almacén, camareiro, montador de cociñas, etc...
• Que fai para desconectar?
Estar na explotación gandeira, facer deporte ou estar coa familia
• Unha virtude e un defecto
Creo na Xustiza social, son humanista con bo corazón. E coma defectos, empecinado
• Un consello para compartir
Fai ben e non mires a quen
• Un libro, unha película ou/e un grupo de música/cantante
‘Requiem por un campesino español’ marcoume. Película quédome con calquera de Woody Allen e gústame todo tipo de música
• Unha afección
Facer deporte, o fútbol, andar en bicicleta ou correr
• Un lugar que visitar
Muras é o Concello por descubrir, o Xistral ten un valor único, fóra de aquí gustoume Croacia
• Unha comida e unha bebida
Gústame comer e probar de todo, pero o caldo é dos meus preferidos e para beber auga
• Unha personaxe admirada
Miña nai, exemplo de como hai que enfrontar a vida e de superación
• Unha posesión apreciada
Non teño posesións apreciadas, son humilde nese sentido
• Un desexo
Que acaben as guerras, que traen moita dor a quen as sofre
• Algo para esquecer
O falecemento de seres queridos, meu pai, meu irmán
• Que é o que máis valora nunha persoa?
A nobreza
• Un desafío pendente.
Teño unha viaxe pendente con meu irmán en bicicleta, este ano foi dende o Picoverde ata Nantes en 17 días. (1500 kms), gústanlle os retos e a min tamén
• Onde se ve en cinco anos?
5 anos son moito tempo trato de vivilo día a día