A Xunta autoriza a ampliación da biblioteca do IES Terra Chá de Castro de Rei
A Consellería de Educación, Ciencia, Universidades e FP vén de licitar por máis de 142.000 euros a ampliación da biblioteca e da aula de Agrícola do Instituto IES da Terra Chá, José Trapero Pardo, en Castro de Rei. O prazo de execución da actuación é de tres meses, unha se vez se adxudique e se formalice o contrato.
As obras enmárcanse no Plan de nova arquitectura pedagóxica, a folla de ruta da Xunta para impulsar a modernización dos centros educativos galegos, incrementar a súa eficiencia enerxética e mellorar o benestar diario da comunidade educativa. Ao seu abeiro está tamén comprometida a obra de rehabilitación do Colexio CEIP Veleiro-Docampo.
Os espazos están situados na planta baixa do edificio principal e na antiga casa do conserxe, separados por un corredor exterior cuberto. O obxectivo da actuación é ampliar a biblioteca ocupando esa zona exterior, para o que se demolerá os muros que separan as dúas zonas, habilitando unha cuberta que una os dous bloques e abrindo dúas novas portas ao exterior, unha para cada un dos espazos.
Na casa da conserxe, que na actualidade ten uso de aula de Agrícola dos ciclos de FP, conservarase un dos aseos suprimindo a bañeira, mentres que se o outro se anulará e formará parte da aula como zona de lavado de material.
A actuación completarase coa instalación de novos falsos teitos, renovación das instalacións de electricidade, iluminación, fontanería, saneamento e calefacción en toda a zona afectada polas obras. Ademais, mellorarase a accesibilidade mediante a execución de dúas ramplas, cambiarase o pavimento e pintaranse os paramentos.