A Xunta destaca o traballo de Queserías del Eume pola eficiencia enerxética
A delegada territorial da Xunta en Ferrol, Martina Aneiros, acompañada do director territorial da Consellería de Economía e Industria, Isidoro Martínez, visitou esta mañá nas Pontes as instalacións da empresa Queserías del Eume SL, onde puxo en valor a importancia de apostar pola sustentabilidade e un consumo máis eficiente dos procesos produtivos entre o tecido empresarial.
Aneiros destacou a relevancia que a sustentabilidade está a adquirir no contexto actual dentro das estratexias das empresas de cara á súa adaptación ás novas demandas do mercado e coa finalidade de mellorar a competitividade dos negocios.
Neste sentido, a delegada territorial puxo de exemplo a Queserías del Eume SL que vén de equipar as súas naves no lugar da Faeira cunha instalación fotovoltaica para o que percibiu unha axuda autonómica de preto de 22.000 euros a través da última convocatoria de axudas para proxectos de autoconsumo e almacenamento enerxético da Consellería de Economía e Industria.
Martina Aneiros destacou tamén a importancia da colaboración-público privada para avanzar neste eido, un traballo que como salientou, ten permitido impulsar ordes de axudas coma esta que “supoñen unha oportunidade para que as empresas reduzan o seu impacto ambiental, melloren a súa eficiencia e abran novas vías de crecemento sustentable”, dixo.
A última convocatoria de axudas para proxectos de autoconsumo e almacenamento enerxético do sector servizos e noutros sectores produtivos deixaron máis de 442.000 euros en axudas a 21 proxectos de empresas das comarcas de Ferrol, Eume e Ortegal.