A Xunta financiará a segunda fase do proxecto de permutas de terras que lidera Friol
A directora Xeral de Agader, Inés Santé, reuniuse cos GDRS da comarca de Lugo, Pontevedra norte e comarca de Ordes para afianzar os últimos pasos da segunda fase do proxecto de cooperación de permutas agrarias.
A Directora Xeral de Agader desprazouse a Friol para manter unha reunión na sede do GDR Comarca de Lugo, xunto con José Ángel Santos, alcalde de Friol e presidente de GDR 4; José Pardo, alcalde de Outeiro de Rei; Mariano Iglesias, alcalde de Mesía; Luis Martínez, alcalde de Ordes; Verónica Vilela, concelleira de Guntín; Lorena López, xerente GDR Comarca de Lugo; Ramiro Ruibal, xerente do GDR Pontevedra Norte; Domingo Lojo, xerente de Asdecomor; María Pérez, xefa do Servizo de Infraestruturas Agrarias, e Carlos Díaz, xefe de Área de Xestión de Movilidade de Terras, para dar as últimas pinceladas e perfilar o remate do segundo proxecto de cooperación para o estudo da ordenación do territorio agrario a través do sistema de intercambio mediante permutas de terras agrarias.
Nesta reunión, a directora Xeral de Agader, Inés Santé, confirmou a concesión duns 275.000 euros para o financiamento da totalidade de toda a segunda fase do proxecto, que supoñerá o final dos traballos iniciados nas zonas de: Friol (Nodar e Condes), Outeiro de Rei (Mosteiro), Guntín (Cibrao-Vilameá), A Estrada (Cabanalas) e Ordes.
Nesta segunda fase van mobilizar case 1.000 hectáreas de superficie agraria, nas que na actualidade están divididas nunhas 3.033 parcelas e beneficiaranse 111 propietarios.
Concretamente o concello de Friol será o municipio con maior superficie, onde se mobilizarán 279 hectáreas distribuídas polas parroquias de Nodar, con 205 ha, que terá un orzamento asignado de 53.613 euros e na de Condes, no lugar de O Castro, con 74 ha, beneficiándose 28 propietarios e cun custo de 22.527 euros.
No municipio de Outeiro de Rei se permutarán unhas 84 ha. no lugar de Mosteiro, cun total de 85 parcelas e participarán 8 propietarios, onde supoñerá un custo de 24.066 euros, así como no concello de Guntín, cun investimento duns 58.067 euros, mobilizaranse 236 h, actuarase nunhas 520 parcelas sendo beneficiados 25 propietarios dos lugares de Cibrao e Vilameá. Xa no municipio da Estrada, no núcleo de Cabanelas mobilizaranse 233 ha. cunhas 1.833 parcelas de 35 propietarios, cun custo estimado de 88.353 euros. Por último, no municipio de Ordes, cun financiamento de 26.516 euros, actuarase en 70 hectáreas de 65 parcela,s sendo propiedade de 15 titulares.
O Grupo de Desenvolvemento Rural (GDR) Comarca de Lugo, despois de poñer en marcha cun primeiro proxecto piloto de permutas e despois do éxito obtido, coordina tamén este segundo proxecto de cooperación xunto co GDR Asociación de Desenvolvemento Comarca de Ordes e GDR Terras de Pontevedra, cuxo principal obxectivo é implantar o procedemento de ordenación en tres zonas con diferentes características de chan agrario mediante o sistema de permuta que permita avaliar a súa idoneidade para aplicalo en zonas nas que non existan problemas de identificación da titularidade da parcela, nin a necesidade de máis infraestruturas viarias, especialmente naquelas zonas con activo consolidado e co fin de mellorar a produtividade das operacións existentes e/o o nacemento de novas iniciativas.
Segundo o presidente do GDR Comarca de Lugo, José A. Santos, “esta cooperación é necesaria para mellorar a estrutura dá propiedade agraria, reducindo ou minifundismo para facer as explotacións máis eficientes mediante un sistema máis sinxelo e con menor custo que a concentración/reestruturación parcelaria”. O alcalde de Friol engadiu “quero agradecer a implicación directa da Xunta de Galicia, concretamente o apoio técnico, económico e de asesoramento de Agader, particularmente moi agradecido ao conselleiro de Medio Rural, José González, que desde o minuto un, mostrou colaboración e foi sempre sensible con este proxecto, de feito, é unha realidade grazas á súa implicación directa”.