A Xunta investirá 150.000 euros nun centro de día en Outeiro de Rei
A conselleira de Política Social, Fabiola García, anunciou, xunto ao alcalde de Outeiro de Rei, José Pardo Lombao, que a Xunta de Galicia achegará 150.000 euros para a construción dun centro de día.
Na visita que realizou a este municipio lucense, Fabiola García avanzou que o convenio entre o concello e o Goberno galego asinarase nas vindeiras semanas e que fará posible dar o primeiro paso para a posta en marcha deste recurso para os maiores de Outeiro de Rei. A construción e xestión posterior do centro será municipal.
O Concello de Outeiro de Rei ten prevista a adquisición da antiga casa do cura e doutra edificación anexa, grazas á colaboración da Consellería de Medio Ambiente a través doutro convenio asinado entre ambas institucións o pasado mes de decembro. En virtude deste acordo, o municipio lucense terá acceso a unha achega de 80.000 euros –que poderá devolver en oito anualidades- a través do Fondo de Cooperación posto en marcha polo Instituto Galego da Vivenda e Solo para apoiar a concellos de menos de 50.000 habitantes en actuacións de rehabilitación e conservación do patrimonio construído.
O obxectivo municipal é acondicionar ambos inmobles para destinalos a un centro de día que se prevé que poida acadar as 60 prazas. O proxecto completo ascende a arredor dos 600.000€. A maiores o concello asume a compra do terreo e o futuro equipamento do centro.