A XV Feira do Indiano de Santaballa contará cun xantar popular o 20 de setembro
A Liga Santaballesa celebra o vindeiro 20 de setembro, a partir das 15:00 horas, a XV edición da Feira do Indiano, que terá como un dos seus principais atractivos un xantar popular. O menú incluirá callos, o prato típico cubano de ropa vieja con arroz, tenreira, tomate e verduras, ademais de costela asada con guarnición, sobremesa, bebidas, café e licores.
O prezo do xantar establécese en 28 euros para adultos, 14 euros para nenos e nenas de entre 7 e 12 anos, mentres que os menores de 7 anos poderán asistir de balde.
As persoas interesadas en participar deberán inscribirse antes do xoves 18 de setembro, contactando co número de teléfono 652 79 02 20. Desde a organización pídese, por motivos loxísticos, indicar o número de comensais e, no caso de querer compartir mesa con alguén, comunicalo no momento da inscrición.
A iniciativa conta coa colaboración da Deputación de Lugo e da Asociación de Amigos da Liga Santaballesa, e busca poñer en valor tanto a tradición como a convivencia veciñal a través da gastronomía.