A zona do IES Basanta Silva acolle unha xornada de sensibilización sobre o consumo de cannabis dirixida á mocidade
Este mércores, 25 de xuño, os arredores do IES Basanta Silva de Vilalba converteranse nun espazo de reflexión e diálogo coa celebración dunha xornada de sensibilización sobre o consumo de cannabis, baixo o lema Decidir coa cabeza clara.
A actividade, dirixida especialmente á mocidade, terá lugar durante a mañá e desenvolverase a través de dinámicas breves, simulacións sen materiais e conversas próximas, co obxectivo de achegar información veraz e promover a reflexión crítica sobre os efectos reais desta substancia.
Durante a xornada abordarase como inflúe o consumo de cannabis na capacidade de estudar, conducir ou tomar decisións, así como a diferenza entre mitos e realidades arredor do seu uso. Tamén se convidará ás persoas participantes a cuestionarse até que punto teñen realmente o control cando afirman “eu sei o que fago”.
Esta iniciativa nace coa intención de previr a través da información, da escoita activa e da creación de espazos seguros nos que a mocidade poida falar abertamente, sen xuízos, sobre este tipo de cuestións.
Desde a organización anímase a participar a todos os mozos e mozas que queiran formar parte dunha prevención baseada no coñecemento compartido e na responsabilidade individual e colectiva.