Abadín remata a obra de mellora doutra vía do rural
O Concello de Abadín vén de executar unha nova intervención na rede viaria municipal, centrada na mellora do camiño que conecta a N-634 no lugar de Meixón, en Roxoa (Castromaior), co núcleo de Asperón, na parroquia de Baroncelle. A actuación abrangue un treito de 2.393 metros e supón un novo avance na renovación das infraestruturas viarias do municipio.
Os traballos realizados incluíron a limpeza e acondicionamento das cunetas, así como a aplicación de aglomerado en quente ao longo de todo o percorrido, o que permite reforzar a seguridade e o confort da circulación. A obra estivo dirixida polo técnico municipal Sergio Orosa López e foi executada pola empresa Construcciones Cholo, S.L.
O investimento total ascendeu a 108.517 euros, dos cales 89.683 euros proceden dunha achega da Xunta de Galicia. Desde o Concello destacan que esta mellora contribúe a facilitar a mobilidade entre parroquias, favorece a comunicación interior e supón un impulso para o desenvolvemento do rural.