Abre en Muras unha mostra fotográfica de Álvaro Lamas
O Concello de Muras inaugura hoxe venres, 29 de novembro, unha exposición fotográfica de Álvaro Lamas, recoñecido artista de Lost in Woodlands Photography, que achega unha coidada selección de case 20 imaxes sobre a natureza do norte galego, ademais das comunidades veciñas de Asturias e Cantabria.
Baixo o título Capturando a Natureza, Lamas invita a redescubrir a beleza e a riqueza natural que nos rodea a través de fotografías que retratan desde fervenzas e solpores ata detalles máis pequenos como un simple cogomelo, mostrando a maxia que esconden os espazos naturais.
A exposición estará aberta ao público na Casa do Médico de Muras, en horario de 9:00 a 13:00 horas, de luns a venres, ata o 7 de xaneiro de 2024.
Esta é unha ocasión perfecta para gozar dunha actividade cultural e contemplar a natureza dende unha perspectiva artística. O Concello de Muras anima a veciños e visitantes a non perder esta mostra única que destaca o privilexio de vivir rodeados dun patrimonio natural incomparable.