Abre o prazo para as axudas para material e transporte escolar en Begonte
O Concello de Begonte vén de abrir o prazo de presentación de solicitudes para as axudas a escolares deste municipio e que van dirixidas a todos os estudantes do termo municipal correspondentes ao curso 2022/23. As axudas están divididas en dúas convocatorias diferentes, por unha banda, as axudas de material e pola outra as de transporte escolar.
As axudas para material escolar están dirixidas a escolares de Infantil, Primeira e ESO que estuden no Concello de Begonte e os alumnos de Educación Infantil e Primaria de Saavedra e Uriz, escolarizados en Rábade.
Tamén terán a consideración de beneficiarios os alumnos empadroados en Begonte que cursen estudios no IES de Rábade ou noutros centros educativos públicos ou concertados, no curso académico 2021-2022.
Estas axudas, que se conceden en función da renda, teñen un máximo de 150 euros e van destinadas á compra de material escolar para todas e excepcionalmente para libros de texto dos cursos 1º e 3º de ESO no IES de Ríbade. Enténdese por material escolar: fichas de traballo de educación infantil, mochilas, cadernos, dicionarios e outros materiais directamente relacionados co desenvolvemento das actividades formativas escolares.
Respecto ás axudas ao transporte escolar durante o curso actual, están dirixidas aos estudantes que cursen estudos de bacharelato, ciclos formativos de grao medio e superior, ou estudos universitarios, co fin de contribuír a paliar o gasto diario ou semanal, que os estudantes teñen como consecuencia do seu traslado a outras localidades para cursar os referidos estudos.
Teñen como requisito estar matriculados actualmente no Concello e Begonte que cursen os estudos superiores e que non teñan xa transporte gratuíto para o desprazamento ao centro educativo.
Os beneficiarios contarán cunha axuda de entre 100 e 200 euros dependendo da distancia do seu centro.
O prazo de presentación da documentación necesaria para o outorgamento destas axudas nos dous casos rematará o 13 de outubro. Esta pode facerse a través da sede electrónica do Concello.