Abre o prazo para que os novos equipos se inscriban nas Olimpíadas Rurais de Galicia de Friol
Xa está aberto un prazo para participar na segunda edición das Olimpíadas Rurais de Galicia, que serán os días 20, 21 e 22 de xuño en Friol. Despois de pecharse o prazo para a renovación de equipos da primeira edición, agora abre un novo tempo para dar entrada a novos equipos. O prazo para esta quenda é ata o 31 de maio.
Despois do éxito acadado na primeira edición, a intención do Concello é seguir impulsando esta cita que consistirá en tres días de xogos tradicionais, deporte, gastronomía, música e sobre todo moita diversión.
Este ano incorporaranse novos xogos, novos equipos e moitas outras novidades.
Cando se presentou a primeira edición explicouse que se considera desde o Concello que Friol é a localización idónea para este evento, xa que, "ademais de ser un concello rural, tamén ten un núcleo urbano marcado, coas instalacións perfectas para organizar este tipo de actividades: piscina, pavillón, campo de fútbol ou espazo para acampada".
Habilitarase unha ampla zona de acampada e unha zona camper para furgonetas e autocaravanas, aínda que cada equipo é libre de xestionar o aloxamento pola súa conta. A comarca de Friol ten capacidade hostaleira suficiente para dar servizo aos visitantes, contando ademais coa cidade de Lugo a 20 minutos en coche para poder dar hospedaxe a visitantes que non o atopen no propio municipio ou nas casas rurais próximas.
Para a primeira edición oficial de Galicia púxose un máximo de 24 equipos, coa idea de ir aumentando cada ano ata un máximo de 48 equipos en futuras edicións.
