Infraestructuras

Os promotores da protesta sinalan ademais que este tipo de instalacións poden xerar emisións, cheiros e molestias

A asociación Amigos das Pontes presentou este xoves no Concello das Pontes unha solicitude formal para a clausura e traslado do crematorio de cadáveres humanos situado na rúa Hermanos Tojeiro. A entidade, que promove esta protesta veciñal, considera que a instalación incumpre a normativa vixente e afecta á calidade de vida do entorno.

O escrito solicita o cesamento da actividade do crematorio xestionado pola empresa San Roquiño, que leva funcionando nos últimos dous anos nesta rúa do casco urbano. Desde a asociación sosteñen que a instalación debe abandonar o seu emprazamento actual para cumprir coa normativa autonómica que regula este tipo de infraestruturas.

A petición baséase no decreto que establece que os crematorios deben situarse a unha distancia mínima de 200 metros do solo urbano. Segundo explican desde Amigos das Pontes, o actual forno crematorio non respecta esa distancia, polo que reclaman ao Concello que adopte as medidas necesarias para garantir o cumprimento da lei.

Na documentación presentada tamén se fai referencia a diversas sentenzas xudiciais que cualifican a cremación de cadáveres humanos como unha actividade potencialmente molesta, o que xustificaría o seu afastamento das zonas residenciais.

Os promotores da protesta sinalan ademais que este tipo de instalacións poden xerar emisións, cheiros e molestias. Segundo indican, estas cuestións xa foron analizadas no informe técnico solicitado polo Concello o pasado ano, ao que engaden o impacto psicolóxico e social que, ao seu xuízo, provoca unha infraestrutura destas características no entorno inmediato.

Durante os dous anos de funcionamento da instalación, residentes da zona manifestaron a súa preocupación pola presenza dun crematorio en pleno tecido urbano, ao considerar que o seu emprazamento resulta incompatible cunha zona residencial consolidada.

A proposta defendida por Amigos das Pontes non pasa pola eliminación do servizo, senón polo seu traslado a un lugar máis axeitado. No documento presentado suxiren que o crematorio sexa reubicado no Cemiterio de Alimpadoiros, un espazo xa destinado a servizos funerarios e que, segundo os asinantes, cumpriría cos requisitos urbanísticos e sanitarios esixidos.

A asociación asegura que con esta iniciativa pretende que o Concello "garanta o cumprimento da legalidade e recupere a calidade ambiental e residencial da zona, que —segundo denuncian— se ve afectada polos restos da cremación de cadáveres humanos en forma de po contaminante que se deposita na roupa e nos vexetais da área”.