Amigus organiza nas Pontes un curso de robótica para nenos
A asociación informática Amigus organiza este sábado 12 de abril un curso gratuíto de programación e robótica con robot TPBot e placa micro:bit, dirixido a nenas e nenos de entre 8 e 12 anos. A actividade será impartida por Ciencia Kids nas instalacións de Amigus, situadas na Avenida de Ortigueira 68-70, en horario de 10:30 a 13:00 horas.
O obxectivo principal do curso é fomentar o interese pola programación e a robótica entre a rapazada, introducíndoos de maneira práctica e lúdica nos conceptos fundamentais da programación, como algoritmos, secuencias, bucles ou estruturas condicionais. Ademais, o alumnado poderá explorar nocións básicas de robótica, como o uso de sensores e actuadores, a través da interacción co robot TPBot.
As inscricións para participar na actividade están abertas desde o pasado 1 de abril ás 9:00 horas, a través da ligazón dispoñible na web de Amigus ou mediante o código QR publicado no cartel oficial do evento. Esta iniciativa pretende achegar as novas tecnoloxías ás xeracións máis novas e incentivar o seu interese por disciplinas clave no presente e futuro laboral.