Aprobadas as obras de rexeneración da estrada que une Belesar e Cazás
O Pleno Municipal aprobou por unanimidade a iniciativa do tenente de alcalde Modesto Renda, relativa á rexeneración completa da vía municipal que une a parroquias de Belesar e Cazás.
Trátase dun novo proxecto de mellora na rede viaria do rural vilalbés, que deixará totalmente renovado unha das vías en peor estado do termo municipal.
Así, actuarase sobre toda vía ata o límite con Xermade. En concreto procederase ao recargo e nivelación das capas base mediante tratamentos semiprofundos e á súa pavimentación mediante dobre rega asfáltica en toda a superficie. Ademais, o proxecto aprobado inclúe a limpeza de cunetas co fin de aumentar a vida útil da estrada.
Para subvencionar esta actuación, dende a Área de Infraestruturas Rurais dispúxose un orzamento de execución por contrata de 10.943,24 euros, que se financiará con cargo ó Plan Único correspondente á presente anualidade 2025.
"Esta obra era un compromiso adquirido coa veciñanza de Belesar, pois fixouse como prioridade na última reunión celebrada na parroquia" declarou Modesto Renda.