Arranca a XII edición da Invernada de Cine de Cabreiros este sábado
A casa escola de Cabreiros volverá ser sede este outono da Invernada de Cine, que este ano chega á súa duodécima edición con actividades durante os meses de outubro, novembro e decembro.
O programa contará con dúas proxeccións, dous espectáculos teatrais e un monólogo. Arrancará este sábado 26, ás 18.30 horas, coa película de Patricia Font El maestro que prometió el mar. Ariadna descobre que o seu avó leva tempo buscando os restos do seu pai, desaparecido na Guerra Civil e decide axudalo polo que viaxa a Burgos, onde están exhumado unha fosa común. Alí coñece a Antoni Benaiges, un mestre de Tarragona cun innovador método pedagóxico.
Continuarán o 9 de novembro, á mesma hora, co monólogo Contaba morrer, de Lois Pérez, un espectáculo que reflicte o optimismo tráxico que define aos galegos.
Mary & Max será a seguinte proxección, unha película de animación de Adam Elliot, que poderá verse o 16 de novembro, un film que fala da amizade aínda que toca asuntos como o alcoholismo, as diferenzas, a soidade, os amigos imaxinarios e os amigos por correspondencia.
En decembro está previsto o día 14 un espectáculo infantil e familiar de Pakolas, As máis molonas, que recolle as cancións máis aclamadas polo público infantil rockeiro galego.
A invernada chegará ao seu final coa obra teatral As fillas bravas e o mito de Casandra, a cargo do grupo Chévere. Son tres pandereteiras que cantan coplas e contan contos escoitados ou inventados, con moita retranca e menos sabedoría.