Arranca este martes a programación de Nadal no CEIP Virxe do Corpiño de Begonte
O Colexio Virxe do Corpiño de Begonte inicia esta semana a súa programación de Nadal 2025, cun conxunto de actividades dirixidas ao alumnado e á comunidade educativa que combinan tradición, solidariedade e lecer. As propostas arrancarán o martes 16 de decembro cunha visita ao emblemático Belén de Begonte, unha cita xa consolidada nestas datas.
A programación continuará o mércores 17 coa celebración da IV Carreira Solidaria San Faiuquiño, unha iniciativa que promove valores de cooperación e compromiso social entre o alumnado. O venres 19 terá lugar a actuación do pallaso Peterpunk, pensada para achegar humor e diversión aos máis pequenos, así como unha sesión de cinema de Nadal na Casiña de Faiuco.
As actividades pecharanse coas tradicionais badaladas, que poñerán o broche final a uns días marcados polo espírito festivo e educativo. Desde o centro destacan que esta programación pretende reforzar a convivencia, fomentar a participación e celebrar o Nadal dun xeito compartido e dinámico.