Arranca unha nova tempada do programa Activa-Mente de Friol
O Concello de Friol anunciou a posta en marcha dunha nova edición do programa Activa-Mente, que retomará as súas actividades o vindeiro 2 de setembro ás 17:30 horas no Centro Colaborativo. Con esta cita dará comezo oficialmente o curso 2025/2026.
A iniciativa está dirixida a promover o benestar físico e mental da veciñanza a través de diferentes propostas que combinan exercicio para o corpo e adestramento para a mente. Entre os seus obxectivos destacan o fortalecemento da memoria, a mellora da mobilidade e o fomento das relacións sociais nun ambiente enriquecedor e de convivencia.
Desde o Concello destacan que participar neste programa supón unha oportunidade para coidar a saúde integral das persoas mentres desfrutan dun entorno dinámico, motivador e pensado para mellorar a calidade de vida. Están organizadas polo Concello e Afalu.