Arrancan as aulas da UNED Sénior da Terra Chá con 70 alumnos en Guitiriz e Momán
A UNED Sénior Coruña, con sede en Terra Chá, comezou oficialmente as súas clases na provincia, sendo a aula de Momán a primeira en poñerse en marcha. Este espazo educativo arrinca o curso cun total de 70 persoas matriculadas, entre as que destacan un marcado interese polas materias de Historia e Música, seguidas de Medicina, Actividade Física e Informática.
As sesións de Medicina están dirixidas pola profesora-titora Mariam Sánchez e impártense semanalmente durante dúas horas na antiga escola de Momán. Nese mesmo centro tamén se desenvolven as clases de Música, a cargo do profesor-titor Francisco Cupeiro, director das escolas municipais de Guitiriz, Meira e Castro Candeas. A materia de Informática corre a cargo do profesor-titor Juan Pardo Vilarinho, tamén cunha duración de dúas horas por semana. Pola súa banda, Historia está coordinada por Luís Ángel Rodríguez Patiño, responsable da UNED Sénior Coruña, e complétase con visitas culturais a museos e lugares de interese patrimonial, como a prevista para o 7 de outubro en Samos, onde o alumnado coñecerá o mosteiro e o patrimonio local.
As aulas da UNED Sénior esténdense por distintas localidades como Lousame, Brión, Monfero, Aranga, Xermade e Guitiriz, con alumnado procedente de Neda, Ferrol, Betanzos e outros concellos da provincia.
O programa está dirixido a persoas maiores de 55 anos que queiran seguir aprendendo e enriquecendo os seus coñecementos. O obxectivo é ofrecer unha formación continua e flexible que contribúa a mellorar a calidade de vida e a fomentar as relacións sociais. Os cursos teñen unha duración aproximada de 30 horas por cuadrimestre e impártense en modalidades presencial, virtual ou híbrida.
No arranque deste curso participaron 47 persoas en Momán e 23 en Guitiriz, ás que se sumarán nas próximas semanas os grupos de Paderne, con 117 matriculacións, Brión, con 20, e Lousame, con 34, entre outras localidades.