Arrinca a primeira edición do Dúatlon Torre dos Andrade en Vilalba
A localidade de Vilalba prepárase para facer historia o vindeiro 19 de abril coa celebración do I Dúatlon Torre dos Andrade - Concello de Vilalba. Esta primeira edición, organizada polo Concello en colaboración co Club Tríatlon Vilalba, nace con grandes expectativas e un escenario de excepción, tendo a maxestosa torre medieval como testemuña principal dun circuíto que se estrea por todo o alto no calendario autonómico.
Trátase dunha proba de dúatlon de estrada puntuable para a Liga Galega de Dúatlon de Estrada, atraendo tanto a competidores de elite como a afeccionados que desexen superar os seus propios límites nunha contorna única.
O prazo para participar xa está aberto e as inscricións poden tramitarse a través da plataforma oficial da FEGATRI (Federación Galega de Tríatlon) ata o 14 de abril.
Dende a organización animan a todos os deportistas a non agardar ao último día para anotarse e formar parte desta cita que combina o desafío físico co valor patrimonial da zona.