Arrinca o Congreso de Arqueoloxía de Vilalba
![unnamed](https://terrachaxa.com/wp-content/uploads/2018/07/unnamed-6.jpg)
A cuarta edición do Congreso de Arqueoloxía que se está a celebrar estes días en Vilalba arrincou onte coas primeiras actividades.
Nas sesións desta primeira xornada presentáronse interesantes comunicacións. Unha foi a presentada polos profesores da Universidade dá Coruña Ana López e Alberto Ramil, que se centraron na metodoloxía matemática avanzada que permite a detección de áreas de alto potencial arqueolóxico e a clasificación de diferentes materiais arqueolóxicos.
Tamén se presentaron os resultados dunha investigación liderada polo Museo de Prehistoria e Arqueoloxía de Vilalba, MUPAV, consistente en analizar o bifaces do xacemento de Louselas (Ribadeo) e comparalos con outros xacementos de Europa, Asia e África, o que confirma a súa antigüidade.
Detaca tamén un interesante traballo da fauna da Cova da Valiña (Castroverde) onde se estudan as súas implicacións cos grupos humanos que habitaron a cova na época dos últimos neandertais. Esta investigación está realizada por científicos das universidades de León, Barcelona e Bos Aires, con participación do MUPAV.
Tres xacementos leoneses en conca sedimentaria do Douro centraron a intervención das profesoras Natividad Fortes e Ana Neira da Universidade de León. Trátase de interesantes xacementos en superficie adscritos ao Calcolítico, é dicir, aos comezos da Idade dos Metais. Investigadores das universidades de Braga, Lisboa e Barcelos defenderon unha comunicación sobre o estudo forense das sepulturas do Calcolítico no Norte de Portugal, grazas ao cal determínase a alimentación e enfermidades destas poboacións.
O grupo de investigación liderado por Ramón Vidal Romaní presentou un importante estudo sobre formas xeolóxicas habitualmente confundidas con arte rupestre, petroglifos. En base a ela vese necesaria a revisión dos catálogos patrimoniais para determinar se son gravados realizados por grupos humanos, ou formas xeolóxicas. As sesións da mañá terminaron coa exposición de José Suárez da Universidade de Santiago dun estudo crítico sobre unha monografía fundamental para o coñecemento da prehistoria peninsular, Die beile auf der Iberischen Halbinsel, cando se cumpren 40 anos da súa publicación en Berlín, aproveitando a ocasión para render homenaxe ao seu autor o Dr. Luís Monteagudo, recentemente falecido.
Pola tarde, o congreso trasladouse á vila de Cedeira, para realizar unha sesión de traballo no Castro de Punta Sarridal e no Castelo da Concepción. No Castro de Sarridal estase procedendo a excavar unha monumental sauna, E. Ramil director das excavaciones debateu cos participantes pormenores dos datos recuperados no transcurso das mesmas.