As marcas das reservas Terras do Miño e Os Ancares Lucenses xa están rexistradas na OEPM
As marcas de calidade que identificarán os produtos e servizos das reservas da biosfera Terras do Miño e Os Ancares Lucenses serán impulsados a través de grupos constituídos este venres pola Deputación de Lugo. Desta forma o Deputado de Medio Ambiente, José Luis Raposo, participou na primeira reunión celebrada de maneira telemática, á que se sumaron representantes das administracións e tamén dos sectores produtivos interesados neste proceso.
As dúas marcas - Reserva da Biosfera Terras do Miño e Reserva da Biosfera Os Ancares Lucenses- xa están rexistradas na Oficina Española de Patentes e Marcas (OEPM) e a Deputación traballa agora nun regulamento consensuado cos produtores e empresarios que desexen empregar este distintivo na etiquetaxe dos seus produtos e servizos. Esta marca tamén lles permitirá empregar o distintivo xenérico de Reservas da Biosfera Españolas, que destaca e diferencia todos aqueles produtos naturais e artesanais dos territorios recoñecidos como Reservas da Biosfera en España, actuando como unha marca paraugas que as aglutina a todas.
A marca estará orientada aos produtos agroalimentarios e artesanais de calidade, pero tamén se poderá aplicar a servizos turísticos (aloxamentos, restauración ou empresas turísticas) que poden á súa vez crear sinerxías cos produtores locais, promovendo unha imaxe integral de calidade de produtos e servizos nas Reservas da Biosfera.
José Luis Raposo destacou que “damos un paso determinante para implantar unhas marcas para os produtos e os servizos de Terras do Miño e dos Ancares Lucenses, que van diferenciar a súa procedencia, profesionalidade e calidade, e que, polo tanto, supoñerán un valor engadido que axudará no desenvolvemento sostible destas zonas”. Tamén salientou o responsable de Medio Ambiente que a Deputación quixo que este proceso fose participativo “porque cremos que é a mellor maneira de que este proxecto se adapte realmente á realidade e ás necesidades do territorio, dos nosos produtores e empresas”.
“Un dos grandes obxectivos da Deputación de Lugo á hora de xestionar as Reservas da Biosfera é favorecer a protección do medio natural e, ó mesmo tempo, contribuír a que esa riqueza natural sexa unha oportunidade de desenvolvemento sostible para o noso rural, porque, está claro que o medio natural sen xente que lle dea vida, non ten ningún sentido”, explicou o responsable provincial.
Un proceso participativo
O proceso de creación das marcas Reserva da Biosfera Terras do Miño e Reserva da Biosfera Os Ancares Lucenses é participativo, respondendo á solicitude dos diversos axentes do territorio e abertos a calquera persoa ou entidade integrada nas reservas.