As Mulleres Rurais de Muras organizan unha viaxe cultural a Lalín o 7 de decembro
A Asociación de Mulleres Rurais de Muras prepara para o domingo 7 de decembro unha viaxe cultural a Lalín que inclúe visitas guiadas, xantar tradicional e actividades de Nadal. A saída está programada para as 8:30 horas diante do concello, desde onde partirá o grupo para unha xornada que combina patrimonio, gastronomía e ambiente festivo.
A primeira parada será ás 11:00 horas no Pazo de Anzuxao, seguido ás 12:00 horas dunha visita ao Muíño de Cuiña. Ao mediodía, ás 13:30 horas, as participantes gozarán dun cocido no restaurante da Casa do Patrón, que máis tarde, ás 16:00 horas, acollerá tamén unha visita ao seu museo etnográfico.
A partir das 18:00 horas, o grupo poderá asistir ao acendido das luces de Nadal na aldea, acompañado de actuacións musicais e dun paseo polo contorno, completando así unha xornada pensada para convivir, descubrir e desfrutar do espírito do Nadal.
O prezo da viaxe é de 32 euros, incluíndo o xantar e a entrada ao museo. As inscricións poden realizarse ata este domingo 30 de novembro a través do teléfono 649 00 64 44. A Asociación de Mulleres Rurais de Muras anima a todas as persoas interesadas a participar nesta actividade que pretende promover o encontro e a dinamización cultural.