As Pontes acolle este venres a primeira Foliada do Muíño de Rita
A vila das Pontes acollerá este venres 26 a primeira edición da Foliada do Muíño de Rita, unha cita musical que nace coa vocación de poñer en valor a música tradicional galega e crear un espazo de encontro arredor do folclore. O evento celebrarase na Sala Medulio a partir das 22:00 horas e contará cun amplo programa de actuacións.
Ao longo da noite subirán ao escenario as formacións Retranka, Axóxere, Os Feroces da Galgueira, Os Trevillas, Canavella e No Cómbaro, xunto coa participación da Escola Municipal de Música das Pontes nas especialidades de gaita, percusión e pandeireta. A programación combina agrupacións consolidadas con colectivos locais, ofrecendo unha mostra diversa da riqueza musical do país.
Tras as actuacións previstas, a festa continuará cunha foliada libre aberta á participación do público, reforzando o carácter popular e participativo do evento. A iniciativa está organizada polas propias agrupacións participantes e conta coa colaboración de Medulio, nunha aposta clara pola dinamización cultural e pola recuperación dos espazos de convivencia arredor da música tradicional.
Desde a organización destacan que esta primeira Foliada do Muíño de Rita pretende consolidarse como unha cita anual no calendario cultural das Pontes, convidando á veciñanza e ás persoas afeccionadas á música tradicional a desfrutar dunha noite de celebración, baile e identidade galega.