As Pontes acollerá unha xornada fotográfica inmersiva o 4 de outubro
As Pontes acollerá o vindeiro 4 de outubro unha xornada pensada para persoas afeccionadas e profesionais da fotografía que queiran aprender, practicar e descubrir a beleza deste enclave galego desde unha nova perspectiva.
Organizada polo Concello das Pontes e Fotowalk Galicia, a iniciativa propón unha experiencia inmersiva que mestura formación técnica, creatividade visual e descubrimento do territorio, ofrecendo unha oportunidade única para mellorar habilidades fotográficas nun entorno inspirador.
A mañá comezará na Casa Dopeso cunha Masterclass sobre iluminación natural en exteriores impartida por Xosé Durán, fotógrafo profesional. Durante a sesión abordarase como controlar a luz en diferentes condicións, evitar sombras non desexadas e conseguir retratos ao aire libre con impacto visual.
A continuación, impartirase un obradoiro práctico en interior centrado no uso de flashes e esquemas de iluminación creativa para destacar suxeitos, produtos ou crear escenas narrativas, permitindo aos participantes experimentar e atopar o seu estilo propio.
Xa pola tarde, a partir das 15:00 horas, celebrarase un roteiro fotográfico guiado de tres horas por algúns dos lugares máis emblemáticos da zona, como o lago das Pontes, a contorna do río Eume e outros espazos naturais cheos de encanto. O percorrido contará coa guía de expertos locais e co acompañamento de Xosé Durán, quen axudará aos participantes a aplicar os coñecementos adquiridos durante a xornada.
O evento é completamente gratuíto, pero as prazas son limitadas, polo que se recomenda inscribirse canto antes. Para máis información e reservas: cultura@aspontes.org.