As Pontes acolleu o cros escolar ao amparo do programa Xogade no que participaron 900 menores
A delegada territorial da Xunta en Ferrol, Martina Aneiros, participou esta mañá na entrega de premios do cros escolar de As Pontes, enmarcado no programa Xogade (Xogos Deportivos Galegos en Idade Escolar) para o curso 2024/2025 que promove a Secretaría Xeral para o Deporte.
Na xornada deportiva, celebrada no parque de A Fraga, participaron ao redor de 900 nenos e nenas de 7 centros educativos da zona: o CPI de Atios (Valdoviño), o CEIP Nicolás del Río (Cedeira), o CEIP de San Ramón (Moeche), o CEIP A Barqueira (Cerdido), o CEIP Santa María (As Pontes), CEIP A Magdalena (As Pontes) e o CEIP Plurilingüe A Fraga (As Pontes).
A representante da Xunta destacou a importancia da práctica deportiva na idade escolar de cara a afianzar hábitos de vida saudables e trasladou as súas felicitacións non só aos gañadores das diferentes categorías (benxamín, alevín, infantil e cadete) senón a todos os escolares que participaron na competición.
O programa Xogade agrupa toda a oferta deportiva e lúdica promovida pola Administración galega (escolar e federada) co obxectivo de levar a actividade a todos os concellos e brindarlle á rapazada a posibilidade de practicar e competir cos clubs e centros educativos de toda a comunidade galega. A de cros é unha das 16 modalidades convocadas dentro da actividade deportiva escolar de Xogade este curso xunto ás de atletismo en pista, bádminton, baloncesto, balonmán, duatlón, encontros multideportivos, fútbol sala, multixogo 6-8 anos, natación, orientación, patinaxe artístico, tenis de mesa, voleibol, xadrez e xogando co atletismo.