'As Pontes Ecuestre' bate récords de participación na súa terceira edición
'As Pontes Ecuestre' celebrou esta fin de semana a súa terceira edición converténdose nun éxito rotundo de participación, con preto de cen saídas a pista no Concurso de Saltos Territorial e ao redor de 120 xinetes e amazonas inscritos na proba do Campionato Galego de Andadura.
O evento, organizado polo Club Hípico Prado Ventura, contou co apoio do Concello das Pontes, da Federación Hípica Galega e, por primeira vez, da Deputación da Coruña, que patrocinou a I Liga Ferrol-Eume-Ortegal.
O Lago das Pontes converteuse así nun dos tres escenarios desta nova liga interclubes, onde os representantes dos clubs Prado Ventura, Equo Alalma e Granxa do Souto buscaron sumar puntos de cara á clasificación final. O público tamén respondeu masivamente á convocatoria, enchendo os arredores do Lago dende primeira hora da mañá para seguir en directo a competición.
A concelleira de Deportes e Turismo, Elena López Seco, acompañada do director deportivo do evento, Federico Pérez Lago, e da presidenta do club organizador, Natividad González Laso, participou na entrega de trofeos xunto a outros representantes municipais e a técnica deportiva Noa García, quen destacou o apoio institucional e do público como claves para o éxito do certame.
No eido competitivo, Sara Suárez Carro proclamouse vencedora na proba de 1.0 metros do Concurso de Saltos Territorial con Rubio. En 0.80 m, Icía Porto Beceiro acadou o primeiro posto con Wakanda. Na proba de andadura, os podios repartíronse entre xinetes de distintas categorías, destacando nomes como Ceferino Gama, Jonathan Lafuente, José Ameneiros ou Darío Casas.
A organización valorou moi positivamente o desenvolvemento do evento e avanza a intención de seguir celebrando novas edicións dun certame que xa se consolida como referente no calendario hípico galego.