As Pontes enPezas suma unha nova obra
![As Pontes en Pezas](https://terrachaxa.com/wp-content/uploads/2020/06/As-Pontes-en-Pezas.jpg)
Esta semana instalábase na vila pontesa o mosaico fotográfico titulado Dous pobos, unha mesma nai: Galiza e Breizh, converténdose no segundo collage do As Pontes enPezas, iniciativa cultural municipal que mistura a arte pública e a participación veciñal, e que xa ten convertido as rúas da localidade nun museo ao aire libre.
Nesta ocasión, o motivo desta peza artística foi resaltar o patrimonio e as raices comúns dos territorios europeos de Galicia e Bretaña, e homenaxear unha histórica amizade que se materializa en máis de 20 irmanamentos entre localidades dos dous países.
Un destes intercambios culturais é o existente entre as vilas de As Pontes e Lesneven, forxado hai xa 29 anos e que perdura no tempo grazas ao labor de dúas asociacións de ambas vilas, que favorecen o contacto e os intercambios anuais e que colaboraron intensamente neste proxecto.
Foron centos de veciños e veciñas dos dous municipios, os que participaron enviando imaxes, nas que ademais dos seus rostros, aprécianse paisaxes, artesanía, monumentos, edificios, gastronomía, personaxes e símbolos identitarios representativos de la cultura celta. Estas fotografías compoñen os corpos de dúas futuras nais repletos de vida e conexión, e ilustradas co símbolo común do trisquel.
O mosaico está ubicado na rúa Real, unha localización privilexiada e rodeada de historia á que se suma esta peza de case 7.000 fotografías cheas de vivencias e cultura. Para esta ocasión tan especial, contactouse telematicamente en directo cos veciños e veciñas de Lesneven, para que non perdesen ningún detalle da instalación desta homenaxe en forma de arte.
O deseño e a composición da obra foi produto dunha nova colaboración do artista multidisciplinar Xurxo Guitián e Deloga, grupo de sociólogos responsables da idea e da recompilación das fotografías deste traballo colectivo.
Quen non poida visitar fisicamente esta obra artística, pode acceder a través do enlace http://galizabreizh.estapaxina.es/ e visionar todas as fotos pasando o cursor por riba.