As Pontes reformará a piscina municipal
![Piscina Municipal](https://terrachaxa.com/wp-content/uploads/2019/01/Piscina-Municipal.jpg)
O Concello das Pontes acometerá, con cargo ao Plan de Obras e Servizos da Deputación da Coruña 2019, a renovación da piscina municipal.
O proxecto, aprobado no pleno municipal e cun orzamento de 347.500 euros, permitirá a adaptación e remodelación dos vestiarios, da zona destinada ao ximnasio así como acometer unha serie de reformas encamiñadas a favorecer as condicións de accesibilidade para as persoas con mobilidade reducida e a renovar a instalación deportiva.
Entre as actuacións previstas ocupa un lugar prioritario a construción dunha nova área de vestiarios para os usuarios e usuarias menores de idade que na actualidade comparten espazo cos adultos. O obxectivo é crear unha zona de cambio específica, con maior seguridade, comodidade e intimidade para os nenos e nenas que acoden, cada día, á piscina municipal. Así mesmo, os traballos nos vestiarios permitirán aumentar a súa funcionalidade e mellorar o seu deseño, rematando coa xeometría labiríntica.
No caso do ximnasio, como resposta ás demandas dos usuarios e usuarias da instalación deportiva municipal, a sala de máquinas, dispersa nos locais do andar baixo e do primeiro andar, quedará situada no primeiro piso, deixando libre a sala de ximnasia.
Executarase un espazo, independente ao vaso da piscina, e procederase á instalación dun sistema de ventilación para dispor dun ximnasio cómodo, cunha temperatura axeitada e unhas condicións saudables, idóneas para a práctica deportiva.
No andar do piso, ademais da nova división dos espazos para a instalación da sala de máquinas, crearase unha zona de duchas de contraste e un espazo terapéutico, complementario á sauna existente.
Na sala de ximnasia do andar baixo crearase, próxima á entrada da instalación deportiva, unha zona de agarda co mobiliario e equipamento preciso para facer a espera máis agradable, principalmente, ás nais e pais dos usuarios máis novos da piscina e, por outra banda, acometerase a remodelación integral do recibidor da piscina para gañar en modernidade e funcionalidade.
O proxecto deseñado polo goberno local inclúe unha serie de reformas, tanto nos vestiarios como no ximnasio destinadas a favorecer as condicións de accesibilidade para as persoas con mobilidade reducida. Crearse un aseo e un vestiario adaptado, seguindo a normativa vixente e construiranse novas ramplas, tanto para a entrada á instalación deportiva como para o acceso ao novo ximnasio do primeiro andar.
Asemade acondicionarase o exterior do edificio co repintado da fachada, a limpeza do bloque visto e a imprimación dunha capa contra a humidade.
Con esta actuación o Concello de As Pontes pretende mellorar un espazo esencial para a práctica deportiva na vila e do que, cada día, gozan centos de veciños e veciñas de todas as idades. Trátase de modernizar a instalación, axuntándose ás demandas e ás necesidades da veciñanza, para continuar promovendo a práctica do deporte, do exercicio físico e da vida saudable entre todos os ponteses e pontesas.