As Pontes será sede do Foro Internacional de industria e renovables en setembro
O foro está impulsado pola Rede Internacional de Agrupamentos Industriais, Loxísticos e Innovadores, A Rede Business Market e o Concello das Pontes. Reunirá os próximos 27,28 e 29 de Setembro no municipio a Corporacións Industriais, Asociacións Empresariais, Investidores e Centros de Innovación de América Latina, EEUU, Europa e África.
As Pontes converterase en sede internacional do Foro Internacional de Industria, Enerxías Renovables e Investimento, un evento que converterá ao municipio no epicentro da innovación, o investimento e o desenvolvemento estratéxico nestes campos nos que o municipio levou a cabo unha aposta decidida pola súa diversificación produtiva.
A concelleira de Industria, Ana Pena, sinala que “desde o goberno municipal entendemos que debemos aproveitar as ferramentas á nosa disposición para apoiar ao tecido empresarial local e promocionar as oportunidades que poden xerar os nosos recursos naturais e potenciais para a atracción de novas industrias que promovan economía e emprego nun territorio que é o primeiro enclave produtor de enerxía do país. Este foro ofrece unha nova canle de difusión para a atracción de investimento que non queremos desaproveitar”.
O evento, enmarcado na participación das Pontes na Rede Business Market, permitirá a conexión do territorio con referentes do campo da innovación e o investimento industrial así como con firmas de referencia no campo da sustentabilidade e a loxística que durante os días 27,28 e 29 de setembro participarán nun programa aberto e transversal ao tecido económico local, rexional e nacional.
Entre as actividades previstas destacan conferencias, mesas redondas, paneis de presentación de proxectos industriais, sostibles e innovadores ou roldas de negocio, alianzas comerciais e financiamento.
O foro, contará coa inauguración do Presidente da Rede Internacional de Agrupamentos Industriais, Loxísticos e Innovadores e á súa vez Presidente da Asociación de Parques Industriais da Arxentina, Rodolfo Games, e no mesmo contarase coa invitación a organizacións empresariais como a Camacol Cámaras de Comercio e Industria Latinas en EEUU ou AEMPYMES Asociación de Emprendedores e Pemes con presenza en EEUU, México, Ecuador e España.
Aspectos como o desenvolvemento do hidroxeno como fonte de enerxía e riqueza nos territorios, o posicionamento dos territorios no novo marco da loxística global ou a atracción de procesos de investimento orientados á reindustrialización como xeradora de riqueza nas rexións serán algúns dos asuntos que abordará este foro.