As Pontes suspende este ano a cita cultural 'Cita coa Historia'
O Concello das Pontes anunciou que este ano non se celebrará a actividade cultural 'Cita coa Historia', organizada tradicionalmente pola asociación Lembranza da Vila coa colaboración do propio Concello.
A decisión foi adoptada pola entidade organizadora, que optou por tomarse un pequeno descanso co propósito de regresar o vindeiro ano cunha edición renovada, cargada de ilusión, forza e novas propostas destinadas a seguir poñendo en valor a historia, o patrimonio e a identidade da localidade.
Tanto desde o Concello como desde a asociación Lembranza da Vila quixeron trasladar o seu máis sincero agradecemento polo apoio, o cariño e a implicación que, edición tras edición, demostran a veciñanza e todas as persoas que se achegan á vila para participar nesta cita tan especial para a comunidade pontesa.