Baamonde acollerá a primeira xornada interescolar de deportes alternativos para alumnado de primaria
O Pavillón Municipal de Baamonde será o escenario este xoves 12 de marzo da I Xornada Interescolar de Deportes Alternativos, unha iniciativa que reunirá a alumnado de terceiro e cuarto de educación primaria de varios centros educativos da comarca.
Na actividade participarán escolares do CEIP Plurilingüe Virxe do Corpiño de Begonte, do CEIP Ramón Falcón de Castro de Rei, do CEIP Santo Estevo de Parga de Guitiriz, do CEIP Otero Pedrayo de Rábade, do CEIP Terra Chá de Román de Vilalba e do CEIP Plurilingüe de Xermade.
Durante a xornada, os nenos e nenas poderán practicar diferentes modalidades deportivas alternativas, entre as que se inclúen o kinball e o cachibol. A iniciativa pretende fomentar a práctica deportiva entre o alumnado ao tempo que promove o traballo en equipo, a convivencia entre centros educativos e o coñecemento de disciplinas deportivas menos habituais no ámbito escolar.