Begonte acolle a próxima semana un taller de alimentación saudable nos maiores
![alimentacion saudable begonte portada](https://terrachaxa.com/wp-content/uploads/2022/10/alimentacion-saudable-begonte-portada.jpg)
O Concello de Begonte organiza o mércores 19 de outubro, na Casa da Cultura un taller de Alimentación Saudable para persoas maiores. A formación será impartida por Enrique del Arco Herrero (Licenciado en Farmacia e Técnico en Prevención de Riscos) a través da Escola Galega de Saúde.
Os obxectivos do mesmo son coñecer os distintos modelos e características dun patrón alimentario saudable e desenvolver destrezas e habilidades para poder realizar eleccións saudables relativas á adquisición e preparación de alimentos.
No programa inclúense a diferenza entre alimentación e nutrición, a importancia da hidratación nas persoas maiores e os cambios orgánicos no proceso de envellecemento como a composición corporal e metabolismo, a mastigación, a diminución nos órganos sensoriais e os cambios en órganos.
Tamén falarán de características da dieta equilibrada (saudable) e a pirámide da alimentación, o estado nutricional, os factores que afectan o estado nutricional da persoa maior e a prevención da malnutrición e enfermidades crónicas.
As inscricións estarán abertas ata hoxe, 14 de outubro.
![alimentacion saudable begonte](https://terrachaxa.com/wp-content/uploads/thumbs/2022/10/alimentacion-saudable-begonte-200x141.jpg)