Begonte dá a coñecer o fallo do L Certame de Debuxo Infantil sobre o Nadal
O xurado do L Certame de Debuxo Infantil sobre o Nadal reuniuse o pasado 5 de xaneiro de 2026 en Begonte para deliberar e emitir o fallo desta edición, unha das citas culturais máis consolidadas do Nadal no municipio. O xurado estivo composto por Sonia Varela García, en representación do Concello de Begonte, e Alba Bermúdez Suárez, da Comisión de Cultura do Centro Cultural José Domínguez Guizán, entidade organizadora do certame.
Tras a avaliación dos traballos presentados, e por unanimidade, acordouse conceder os premios nas distintas categorías establecidas. Na categoría A, dirixida ao alumnado ata 3º curso de Educación Primaria, foron recoñecidos con primeiro premio Ángel Rouco Reboredo, de 2º de EP do CEIP Plurilingüe Virxe do Corpiño de Begonte, e Jara García Fernández, de 2º de EP do CEIP Plurilingüe de Foz nº1. Os segundos premios recaeron en Mariña Fernández Vázquez, de 1º de EP do CEIP Celso Currás de Trabada; Dafne Sanmiguel Garrido, de Educación Infantil de Guitiriz; e Sabela Nogueira Pereiro, de 5 anos.
Na categoría B, correspondente ao alumnado de 4º a 6º de Educación Primaria, os primeiros premios foron para Daniela Fra Cancio, de 9 anos, do CEIP Cantel de Foz, e Edgar Fernández Castro, de 6º de EP do CEIP Antonio Insua Bermúdez de Vilalba. Os segundos premios foron concedidos a Moraima Liñeira Vázquez, de 9 anos e 4º de EP do CEIP Cantel de Foz; Fátima Maskow, de 4º de EP do CEIP Plurilingüe de Muimenta; e Luca Florin Gheorghe, de 6º de EP do CEIP Plurilingüe Virxe do Corpiño.
Na categoría C, destinada ao alumnado de 1º a 4º curso de Educación Secundaria Obrigatoria, os primeiros premios recaeron en Marcos Cabada Dopico, de 3º de ESO do IES Vilar Ponte de Viveiro, e Zaira Pérez Rodríguez, de 2º de ESO do mesmo centro. Os segundos premios foron para Sara López Eijo, de 15 anos, do IES Vilar Ponte; Aroa Pita Rodríguez, de 3º de ESO do IES Illa de Sarón de Xove; e Marcos Mariño Ferreira, tamén de 3º de ESO do IES Illa de Sarón.
A entrega de premios celebrarase o vindeiro 31 de xaneiro, coincidindo co acto de clausura da programación O Nadal en Begonte, que porá fin ás actividades organizadas durante as festas. Desde a organización destacaron a elevada participación e a calidade dos traballos presentados, así como o interese do certame por fomentar a creatividade artística entre a infancia e a mocidade.