Casino Montreal actúa este sábado nas Pontes
As Pontes acollerá este sábado, 28 de setembro, o concerto do grupo Casino Montreal, que será ás 20.00 horas no auditorio Cine Alovi con entrada de balde.
Casino Montreal é unha banda de Ponferrada que en 2023 puxo fin ao seu proxecto anterior, The Morgans. O Home Excepcional é o seu primeiro disco e viu a luz en outubro de 2023 coa produción de Carlos Hernández (Viva Suecia, Sidecars, Joaquin Sabina…) que inclúe nove contundentes temas de indie rock en castelán con pegadizos retrousos, ritmos moi marcados, unha produción eufórica e unhas letras interesantes. Cancións na que van debullando a figura do «home excepcional», dando a entender o complicado que resulta para unha persoa trazar o seu propio camiño para chegar a esa singularidade.
Esta actividade ponse en marcha co apoio do Instituto para a Transición Xusta e a Fundación Ciudad de la Energía (CIUDEN) a través do programa Dinamiz-artj co que se pretende xerar unha oferta cultural ampla nos municipios afectados polo proceso de peche de instalacións en zonas de Transición Xusta.