Castro de Rei acolleu unha xornada de Fademur polo 25N centrada na realidade das mulleres rurais
As xornadas Aliadas Sororas, organizadas por Fademur con motivo do 25 de novembro, Día Internacional para a Eliminación da Violencia contra a Muller, celebráronse este luns no local da Asociación de Mulleres Rurais “A Xuntanza”, en Castro de Rei. O encontro reuniu representantes institucionais e profesionais da loita contra a violencia machista, nun espazo de análise e reforzo do traballo en rede no ámbito rural.
A presidenta de Fademur Galicia, Verónica Marcos, abriu o acto dando paso ao director xeral de Loita contra a Violencia de Xénero da Xunta, Roberto Barba, e á subdelegada do Goberno en Lugo, Olimpia López, encargada da inauguración. López salientou que “sen recursos no rural non hai igualdade real nin protección eficaz fronte á violencia machista”, ao tempo que puxo en valor o estudo presentado por Fademur, no que seis de cada dez mulleres aseguran coñecer casos de malos tratos na súa contorna e máis do 76 % considera que non está tan protexida como nas áreas urbanas.
A subdelegada advertiu de que a violencia “é máis silenciosa nos pequenos municipios, onde o illamento pesa e a presión social pode frear a denuncia”, polo que instou a reforzar o acompañamento, a formación e os servizos públicos. Lembrou tamén o compromiso do Goberno de España cunha política feminista que garanta protección e dereitos “para todas as mulleres, vivan onde vivan”, e destacou o traballo realizado desde o Ministerio do Interior en formación dixital e resposta ás novas formas de violencia.
A xornada contou coas intervencións de Marisa Castro, xefa da Unidade de Violencia sobre a Muller da Subdelegación; David Rodríguez, tenente e xefe accidental da Compañía da Garda Civil de Vilalba; e Tamara Bello, integrante do equipo Viogén. Abordaron retos como o aumento da ciberviolencia entre a mocidade, o impacto do control dixital e a importancia da coordinación institucional.
Pola súa banda, o director xeral Roberto Barba explicou os recursos que a Xunta pon á disposición das vítimas, desde prestacións económicas para garantir autonomía ata servizos habitacionais, así como atención psicolóxica e xurídica gratuíta. Subliñou que a sensibilización segue a ser “a mellor ferramenta para previr calquera violencia” e destacou o convenio coa federación, dotado con 20.000 euros, para impulsar accións de prevención e detección no rural.
Olimpia López agradeceu a Fademur “o traballo constante, a investigación rigorosa e a capacidade para visibilizar realidades que durante anos quedaron fóra do debate público”, e concluíu asegurando que a Subdelegación do Goberno en Lugo permanecerá “á disposición para avanzar xuntas na defensa dos dereitos das mulleres e na loita contra todas as violencias machistas”.