Castro de Rei remata as obras de mellora enerxética da EDAR
Os traballos realizados na planta, situada en Castro Ribeiras de Lea, permitiron duplicar a capacidade da planta, pasando de 350 a 750 m3 diarios, ofrecendo servizo a unha poboación de máis de 3.000 persoas.
A subdelegada do Goberno en Lugo, Isabel Rodríguez, exemplificou hoxe no Concello de Castro de Rei a pegada que está a ter o Plan de Recuperación, Transformación e Resiliencia do Goberno nos pequenos municipios. “Castro de Rei é un claro exemplo de como o Goberno leva a todos os recunchos da provincia o Plan de Recuperación, impulsando a mellora de infraestruturas naqueles concellos do reto demográfico e transformando a vida no medio rural”, salientou.
Isabel Rodríguez desprazouse esta mañá ata Castro de Rei para comprobar o resultado das obras de ampliación e mellora da eficiencia enerxética da estación depuradora de augas residuais (EDAR) do municipio, que contaron cun investimento de 792.000 euros por parte do Estado. A subdelegada, xunto ao alcalde, Francisco Balado, explicou que esta axuda concedida polo Ministerio para a Transición Ecolóxica e o Reto Demográfico forma parte do programa DUS 5000, dirixido a proxectos locais de enerxía limpa e aforro enerxético en municipios de menos de 5.000 habitantes, cubrindo o 80% do total da actuación, “significa unha achega fundamental para que Concellos como o de Castro de Rei poidan afrontar unha obra tan importante”, resaltou.
“As melloras na depuradora de Castro de Rei enmárcanse no sólido compromiso do Goberno Central co municipalismo e co reto demográfico, orientadas a loitar contra o despoboamento, pois esta renovada infraestrutura posibilita o crecemento da poboación no municipio, xa que coa anterior capacidade da estación depuradora o Concello non podía conceder licenzas de obras a novas vivendas”, destacou Isabel Rodríguez.
A subdelegada supervisou os traballos realizados na EDAR, situada en Castro de Ribeiras de Lea, que permitiron duplicar a capacidade da planta, pasando de 350 a 750 m3 diarios. As actuacións realizadas centráronse na reforma, transformación e modernización dos diferentes elementos que compoñen a planta de tratamento de augas residuais. Concretamente, instalouse un xerador de corrente no tanque anaerobio, dotouse de contactores biolóxicos rotativos e a adaptouse o pozo de bombeo para a recirculación de auga nitrificada, entre outros traballos.
“Dende o Goberno cumprimos cos veciños e veciñas de Castro de Rei que demandaban, dende hai moito tempo, melloras na EDAR para adecuar a capacidade de tratamento da depuradora ás necesidades reais do municipio e poñer fin á problemática derivada do excesivo volume de augas residuais en rede e da súa carga contaminante”, manifestou Isabel Rodríguez.
Estes traballos contribuirán a mellorar a eficacia das plantas da depuradora, evitando vertidos ao río Lea, dando servizo a unha poboación de máis de 3.000 persoas do casco urbano de Castro Ribeiras de Lea, “acadando un municipio máis sostible e con mellores estándares de calidade medioambiental”, apuntou a subdelegada. Nesta liña, puxo en valor as políticas que está a impulsar o Executivo Central en materia de transición enerxética que permiten ao Concello de Castro de Rei reducir o consumo de enerxía eléctrica da EDAR en máis de 12.000kWh ao ano, o que supón un gran aforro enerxético e económico para as arcas municipais.
“Imos seguir traballando nesta liña para que os fondos europeos sigan chegando a todos os municipios da provincia de Lugo e, deste xeito, os Concellos poidan impulsar actuacións sostibles que axuden a fixar poboación e que melloren a calidade de vida dos seus veciños e veciñas”, concluíu a subdelegada.