Celebran o domingo unha camiñada polos lugares preferidos de Manuel María
![BancoAlimentosAsPontes 696x535](https://terrachaxa.com/wp-content/uploads/2019/09/BancoAlimentosAsPontes-696x535-e1569831004685.jpg)
A Casa-Museo organiza para este domingo, 1 de decembro, unha camiñada por algúns dos lugares de Outeiro de Rei máis íntimos de Manuel María.
A actividade, que leva por título “Polos camiños da tribo”, será guiada e dinamizada por Orlando Viveiro, estudoso e divulgador cultural. O percurso, de seis quilómetros, e cunha dificultade baixa, terá a súa saída ás 10 hrs, desde a Casa-Museo, e a súa chegada ao mesmo lugar contra as 12.30.
O regato do Cepelo, A Barciela, as beiras do Miño, o Campo de Santa Isabel...serán algúns dos lugares polos que pasarán as persoas que participen no roteiro, en que se intercalarán explicacións do patrimonio natural e cultural do lugar coa lectura dalgúns poemas e textos de Manuel María. Outeiro de Rei, cos seus distintos espazos e persoeiros, significou para Manuel María non só o inicio vital, senón tamén as primeiras descubertas e ensoñares para a súa creación literaria.