Chega a Roupar 'Minerflu, unha volta polo mundo', un espectáculo familiar de humor e circo
O espectáculo multidisciplinar Minerflu, unha volta polo mundo chegará hoxe, 26 de decembro, á Escola Habaneira, na parroquia de Roupar, no concello de Xermade, cunha proposta pensada para todos os públicos que combina humor, circo e participación activa do público. A función dará comezo ás 17.30 horas e preséntase como unha alternativa cultural e lúdica para gozar en familia durante as datas do Nadal.
A protagonista do espectáculo é unha pallasa divertida, algo torpe e despistada, que chega disposta a sorprender cos seus malabares, convertidos en singulares medios de transporte cos que emprende unha viaxe simbólica arredor do mundo. Ao longo da representación, a interacción co público convértese nun elemento fundamental, facendo que as persoas asistentes formen parte da historia e contribúan ao desenvolvemento das situacións cómicas.
A proposta destaca polo seu carácter dinámico e pola súa capacidade para conectar con públicos de todas as idades, apoiándose nunha linguaxe visual, xestos cómicos e números circenses cheos de imaxinación. O espectáculo enmárcase no programa Dinamiz-ARTj, promovido polo Instituto para a Transición Xusta e a Fundación Ciudad de la Energía, co obxectivo de achegar a cultura e as artes escénicas aos territorios rurais.