Todo preparado para a cuarta edición do Festival Cultural Pozo Mouro de Muimenta
![pozomouro-festival](https://terrachaxa.com/wp-content/uploads/2024/07/pozomouro-festival.jpg)
Tralo éxito das tres primeiras edicións, este sábado terá lugar a cuarta do festival Pozomouro, organizado pola Asociación Cultural Avelino Iglesias Alvariño na área recreativa Ribas do Miño, en Muimenta.
A data adiántase de novo a edicións anteriores, que se celebraron o 31 de agosto de 2019 e o 4 de setembro de 2022. A celebración comeza todos os anos con música dende media mañá e as actividades complétanse cunha romaría popular na que os participantes deberán achegar o seu xantar.
Así entre as actividades previstas ademais do apartado musical, haberá un obradoiro de danza na natureza con Eva Quiroga e unha ruta á beira do Miño, actos que culminarán coa regulamentaria sesión vermú.
Entre os actos da tarde figura un obradoiro ilustrado con Elr Elvi, de música con Pintega Sistema de Son e de bordado con Virginia.
Para os pequenos haberá unha ludoteca ambulante e os contacontos de Caxoto.
Terá lugar tamén un recital poético con Suso López e Diana Kurichantes, que dará paso aos concertos.
Os protagonistas deste ano serán Old Times Spooks, Habela Hainas, Balkumbia, Zeltia Irevire e DjSet con Sapoconcho SemPoncho e Rorro.
A organización lembra que haberá zona de acampada de balde para os que o desexen e un mercadiño cultural.