Codesido celebrará a festa da Virxe dos Remedios cunha xornada de música e tradición
A localidade Codesido, en Vilalba, acollerá este sábado 21 de marzo a tradicional festa de ofrenda en honra á Virxe dos Remedios, unha cita que combinará actos relixiosos e propostas festivas ao longo de toda a xornada.
Os actos comezarán ás 13.30 horas coa misa solemne e a posterior procesión, que reunirán a numerosos fieis e veciños nun dos momentos máis significativos da celebración. A continuación, terá lugar a sesión vermú, que estará amenizada pola orquestra Escaparate.
Xa pola noite, a festa continuará cunha verbena que contará coa participación da propia orquestra Escaparate e da artista Nerea Cobas, nun evento que se desenvolverá nun campo cuberto con carpa para garantir o desenvolvemento da celebración independentemente das condicións meteorolóxicas.