Colaboración cultural nas festas vilalbesas co Iescha para todos os públicos
Un ano máis, o Instituto de Estudos Chairegos (Iescha) suma a súa achega ao programa das Festas de San Ramón e Santa María de Vilalba, consolidando unha colaboración que se vén repetindo ao longo dos anos e que converte á entidade nun dos principais motores culturais da vila. A súa proposta abrangue exposicións, música e cinema, ofrecendo unha programación diversa que complementa o carácter festivo destas datas cunha forte vertente artística e divulgativa.
A primeira cita foi o venres 1 de agosto, coa inauguración da exposición Retrospectiva de óleos de Pepe Lafuente, que se poderá visitar na Casa da Cultura ata o 3 de setembro. Ás 20:30 horas abriuse oficialmente ao público unha mostra que recolle a traxectoria e a evolución artística deste creador, ofrecendo unha oportunidade única de achegarse á súa obra pictórica.
Xa a finais de mes, o xoves 28 de agosto, ás 20:00 horas, o Auditorio Municipal acollerá a inauguración da exposición Retrospectiva de Pedro Cabarcos Quintela, unha cita que permitirá coñecer de preto a produción deste artista lucense. A mostra permanecerá aberta ata o 4 de outubro, prolongando así o espírito cultural das festas máis alá da semana grande.
Pedro Cabarcos Quintela naceu en Vilalba en 1955 e reside en Viveiro. Licenciado en Historia da Arte pola Complutense de Madrid e profesor de Debuxo de Ensino Secundario, leva varias décadas dedicado á docencia.
O retrato constitúe unha das súas grandes paixóns, nas que continúa experimentando, influído pola súa formación académica en Historia da Arte, aínda que tamén traballa a paisaxe a plein air.
A súa obra recibiu recoñecementos internacionais, entre os que destaca a selección do cadro Ana para a fase final do BP Portrait Award 2020 na National Portrait Gallery de Londres. En 2024 gañou o premio da Fundazione Amadeo Modigliani de Roma co cadro Esperanza.
MÚSICA E CINE
A música será protagonista o venres 29 de agosto cun dos concertos máis esperados: o de A Banda da Loba, que presentará o seu espectáculo Lovismo no Auditorio Municipal a partir das 22:00 horas. A formación, recoñecida polo seu estilo fresco e reivindicativo, achegará a Vilalba unha proposta enérxica e cargada de emocións, que combina a forza da palabra coa calidade musical.
O ciclo pecharase o xoves 4 de setembro, tamén no Auditorio Municipal, cunha nova sesión do Ciclo Premios Mestre Mateo, que trae a proxección da comedia galega +Cuñados, de Luis Avilés.
A cita será ás 20:00 horas e ofrecerá ao público unha das películas máis celebradas da produción audiovisual galega recente, cargada de humor e con grandes interpretacións.
Con esta programación, o Iescha volve demostrar o seu compromiso co fomento da cultura en Vilalba, achegando actividades que abranguen distintas disciplinas e públicos. O argumento do filme comeza cun cadáver que aparece xusto no medio da ponte internacional de Tui. Uns días antes...
Chegou o Entroido e a familia Ribeiro prepárase para desfrutar das festas favoritas de calquera bo ourensán. Pasaron dous anos desde a detención de Alicia Zamora e o seu socio portugués. Os cuñados montaron un posto de polbo en Ourense, a maneira perfecta para branquear os cartos do botín que lles caeu do ceo. Entre unha cousa e a outra, Modesto converteuse nun membro máis da familia. Un cuñado máis. A aparición en Ourense de Andreia Nunes (a parella do portugués) en busca de vinganza, complicará as cousas para os cuñados, meténdoos nun novo enredo que rematará cun cadáver no medio da ponte internacional de Tui. E que converterá este Entroido nun auténtico baile de máscaras.