Comeza en Guitiriz o curso da USC Turismo e paisaxe
![unnamed](https://terrachaxa.com/wp-content/uploads/2018/07/unnamed-4.jpg)
O tradicional curso de verán sobre Paisaxe que promove a Universidade de Santiago de Compostela regresa á localidade lucense de Guitiriz, concretamente á Casa Habanera, e faino alcanzando este ano a 11ª edición.
A Deputada de Promoción económica e social, Sonsoles López Izquierdo, participou na inauguración do curso Turismo e paisaxe, co que colabora a Deputación. As 50 persoas matriculadas nesta edición examinarán durante tres días a relación entre o turismo e a paisaxe dende diferentes áreas de coñecemento, polo que aborda o tema desde diferentes disciplinas como Historia, Medio Ambiente, Enxeñaría, Economía, Urbanismo e a percepción literaria e artística.
López Izquierdo destacou que “nos estudos de turismo, a paisaxe debería ser considerada máis polo miúdo como un recurso turístico. É un recurso fráxil e difícil de administrar porque se se degrada en exceso, a súa recuperación pode ser moi custosa. Dende a Deputación colaboramos moi estreitamente coa USC, e cursos coma este, no que se estuda a realidade natural e cultural pero tamén turística, son básicos para aplicar mecanismos de actuación non contraproducentes para desfrutar dende o turismo de espazos sensibles como son as paisaxes”.
Durante os tres días que durará o curso, trataranse temas como a creación dunha imaxe identitaria de Galicia, os espazos sensibles como as paraxes naturais das montañas e das illas atlánticas galegas, a autenticidade e a paisaxe do ecoturismo e o patrimonio verde de Galicia. O curso tamén lles achegará aos participantes nocións sobre turismo ornitolóxico e turismo mariñeiro. O alumnado realizará ademais un roteiro polo Concello de Guitiriz e a observación de ceos nocturnos
CONFERENCIA INAUGURAL
A directora de Turismo de Galicia, Nava Castro pronunciou a conferencia inaugural do Curso de Verán Turismo e paisaxe. Baixo o título Galicia Parabéns: a mellor imaxe de Galicia, Castro repasou as políticas que a Xunta está a desenvolver nesta materia a través da Estratexia do turismo de Galicia 2020 e salientou a relevancia que teñen na Comunidade como destino e na opinión dos viaxeiros.
En particular, a directora detívose no proxecto dos premios Galicia Parabéns, dotados de 1,6 millóns de euros nas súas dúas primeiras edicións e que buscan tres obxectivos: distinguir as mellores iniciativas xa realizadas de embelecemento do territorio galego, financiar novos proxectos que complementen as actuacións levadas a cabo e impulsar novas propostas de actuacións que teñan esta mesma orientación. Os primeiros galardoados foron os concellos de Boqueixón e Portomarín, aos que proximamente se unirán dúas novas localidades.
“A paisaxe é un dos elementos aos que máis importancia concede a Estratexia do turismo de Galicia 2020”, sinalou Nava Castro ao referirse ao documento que guía as actuacións da Xunta neste eido e que foi deseñado en consenso co sector para afondar nun destino de calidade, tranquilo e responsable. Esta aposta tradúcese no seu orzamento, pois a paisaxe, os recursos naturais e a sustentabilidade concentran máis de 88 millóns de euros, é dicir, o 37% do total de investimentos da Estratexia 2020, con accións ao longo de catro anos.
A través deste investimento, avánzase en catro direccións: o impulso ao uso turístico sustentable da paisaxe, a recuperación e mantemento de núcleos singulares, o control de capacidade de carga e redistribución de fluxos e a sustentabilidade das infraestruturas.
Valoración dos peregrinos
Nava Castro salientou tamén que a natureza e a paisaxe son a principal motivación pola que os turistas visitan Galicia. Así o afirma un 42,5% os viaxeiros, seguidos dun 25,8% que elixe a enogastronomía e dun 24,9% que valora especialmente a tranquilidade e o descanso.
O mesmo patrón repítese cos peregrinos. Segundo o Estudo do impacto socieconómico do Camiño de Santiago elaborado pola Universidade de Santiago de Compostela a petición da Xunta, a contorna natural é o elemento máis apreciado polos que peregrinan en grupo e o terceiro entre quen o fai en solitario tras a seguridade e a interacción con outros peregrinos.
“A paisaxe, como recurso estratéxico, debe ser preservada e posta en valor tamén desde un punto de vista turístico, garantindo sempre a sustentabilidade do espazo natural”, salientou Nava Castro, quen detallou os proxectos gañadores da I edición dos Galicia Parabéns.
Proxectos premiados
A actuación distinguida co galardón no concello de Boqueixón é a mellora do Pico Sacro e a súa contorna. Trátase dun cumio ao que nos últimos anos se destinou un importante esforzo para a súa posta en valor como referente xeográfico, paisaxístico, histórico e lendario, e fito clave no relato xacobeo. A través desta convocatoria, é posible o reacondicionamento do Centro de Interpretación do Pico Sacro, a integración paisaxística de edificacións como o deposito de augas na faldra da montaña e a recuperación da harmonía entre arquitectura e paisaxe co derrubamento dunha estrutura de formigón abandonada desde hai décadas.
No caso de Portomarín, o proxecto gañador foi a reordenación do Parque de Agustín do Río, o que permitirá embelecer a primeira estampa que teñen da vila os peregrinos que chegan polo Camiño Francés e dotar de novos servizos a veciños e visitantes. A proposta busca realizar unha intervención neste parque urbano, replantando unha trintena de carballos e incorporando unha seria de elementos novos, ademais da demolición de gradas de formigón e a colocación de xardíns verticais cos que mimetizar o impacto visual dos muros.