Comeza a instalación do aire acondicionado na Escola Infantil Municipal vilalbesa
![obras-instalacion-aire-acondicionado-escola-infantil](https://terrachaxa.com/wp-content/uploads/2024/08/obras-instalacion-aire-acondicionado-escola-infantil.jpg)
O Concello de Vilalba vén de informar que a empresa COFRICO, adxudicataria das obras de colocación dun sistema de climatización e ventilación na Escola Infantil Municipal, iniciou no día de onte os traballos para proceder á instalación do mesmo, de forma que se aproveita o peche da escola durante as vacacións de verán para non interrumpir o funcionamento habitual da mesma.
Nesa liña, os operarios comezaron xa a realizar as primeiras actuacións para canalizar o sistema de ventilación e climatización, que se sumarán nas vindeiras semanas á instalación e conexionado do sistema nas aulas da planta baixa do edificio, concretamente nas de 0 a 1 anos e na de 1 a 3 anos.
Ademais, o aire acondicionado tamén se instalará na zona común que funciona como patio de xogos e nos despachos de secretaría e dirección. De tal forma que o contrato das obras sumará un importe de 54.045 euros, con cargo ao Plan Único de Cooperación cos Concellos da Deputación de Lugo.
Como se explicou fai unhas semanas, o Concello pretende con esta obra "dar solución a un problema que cada verán se viña agravando por mor da chegada das altas temperaturas", explicou a alcaldesa, Marta Rouco, que se achegou xunto ao concelleiro de Infraestruturas Urbanas, Luis Fernández, a comprobar os primeiros avances das obras.
Así mesmo, a rexedora lembrou que se trata dunhas obras “imprescindibles para permitir que os nenos e nenas permanezan nas instalacións nunhas condicións óptimas e agradábeis” e sinalou que "a previsión é ter rematadas as actuacións para finais deste mes ou comezos do que vén, de tal xeito que o sistema poida aproveitarse nas últimas semanas de verán".